လုပ်ငန်းခွင်အတွင်းထိခိုက်နစ်နာမှုအကျိုးခံစားခွင့်။
မသန်စွမ်းဖြစ်မှု /လုပ်ငန်းခွင်အတွင်းထိခိုက်နစ်နာမှုအကျိုးခံစားခွင့်။
အလုပ်တွင် ထိခိုက်မှုများကို နောက်ဆက်တွဲဖြစ်စဉ်အပေါ်မူတည်၍ခွဲခြားနိုင်သည်။
(၁) အမြဲတန်း လုံးဝမသန်စွမ်းဖြစ်ခြင်း
(၂) အမြဲတန်း တစိတ်တပိုင်းမသန်စွမ်းဖြစ်ခြင်း
(၃) ယာယီ မသန်စွမ်းဖြစ်ခြင်း
(၄) ပြင်းထန်သောထိခိုက်မှုကြောင့်အလုပ်သမားသေဆုံးခြင်း
အမြဲတမ်းလုံးဝမသန်စွမ်းမှုနှင့်ဆိုင်သည့် ငွေကြေးအကျိုးခံစားခွင့်အတွက် အလုပ်တွင်ထိခိုက်မှုမဖြစ်မီ လေးလအတွင်း ပျမ်းမျှလုပ်ခ တစ်လစာ၏ ၇၀ ရာခိုင်နှုန်းကို ပေးရမည်။ အမြဲတမ်းလုံးဝမသန်စွမ်းသူ ကို အခြားသူတစ်ဦးတစ်ယောက်က အမြဲမပြတ်ပြုစုရန်လိုအပ်ကြောင်း ဆေးသက်သေခံလက်မှတ်တင်ပြလျှင် ထိုသူခံစားခွင့်ရှိသော အကျိုးခံစားခွင့်၏ ၁၀ ရာခိုင်နှုန်းနှင့် ညီမျှသောငွေကို ထိုသူ၏ဆန္ဒအရ အရစ်ကျဖြစ်စေ၊ တစ်လုံးတစ်ခဲတည်း သို့မဟုတ် လစဉ် အသက်ထက်ဆုံးအထိဖြစ်စေ ထပ်ဆောင်၍ ခံစားခွင့်ရှိသည်။
အမြဲတန်း တစိတ်တစ်ဒေသ မသန်စွမ်းမှုနှင့်ဆိုင်သည့် အကျိုးခံစားခွင့် တို့၏ အချိုးအစားသည် အလုပ်တွင် ထိခိုက်ဒဏ်ရာရမှုကြောင့် အလုပ်လုပ်နိုင်သော အင်အားဆုံးရှုံးမှု၏ အချိုးအစားနှင့် ညီမျှရမည်။ မသန်စွမ်းဖြစ်ရမှုအတိုင်းအတာပေါ်မူတည်၍ မစွမ်းမသန် ပင်စင်အပြည့်၏ အချိုးကျ % ကို ပေးရန်ဖြစ်သည်။ လုပ်အားဆုံးရှုံးမှုမှာ ၂၀ ရာခိုင်နှုန်းနှင့် အောက်ဖြစ်ပါက ထိုသူခံစားခွင့်ရှိသော လစဉ်အကျိုးခံစားခွင့်၏ ငါးနှစ်အတွက် ရထိုက်ခွင့်ရှိသော ငွေကြေးကို တစ်လုံးတစ်ခဲတည်း ခံစားခွင့်ရှိသည်။
ယာယီမသန်စွမ်းမှုနှင့်ဆိုင်သည့် အကျိုးခံစားခွင့်အဖြစ် အလုပ်တွင်ထိခိုက်မှုမဖြစ်မီ လေးလအတွင်း ပျှမ်းမျှလုပ်ခ၏ ၇၀ ရာခိုင်နှုန်းကို အလုပ်စတင်မလုပ်နိုင်သည့်နေ့မှ အများဆုံး ၁၂ လ အထိ ခံစားခွင့်ရှိသည်။
လူမှုဖူလုံရေးအဖွဲ့၏ ဆေးဘက်ဆိုင်ရာအဖွဲ့သည် လုပ်အားဆုံးရှုံမှု ရာခိုင်နှုန်းကို ဆန်းစစ်ရမည့်အပြင် လူမှုဖူလုံရေးအဖွဲ့ကတောင်းဆိုသည့် မည်သည့်အချိန်တွင်မဆို ပြန်လည်ဆန်းစစ်မှုများ ဆောင်ရွက်ရမည်။ အာမခံထားသူအလုပ်သမားသည် ဆေးစစ်ဆေးရန်လာရောက်ခြင်းပျက်ကွက်ပါက လူမှုဖူလုံရေးအဖွဲ့ အနေဖြင့်အလုပ်သမား၏ အကျိုးခံစားခွင့်ကို ယာယီသော်လည်းကောင်း၊ အမြဲတန်းသော်လည်းကောင်း ရပ်ဆိုင်းနိုင်သည်။
အလုပ်တွင်ထိခိုက်မှုကြောင့် သေဆုံးမှုအတွက် ကျန်ရစ်သူအကျိုးခံစားခွင့်ကို အာမခံထားသူက အမည်စာရင်းပေးသွင်းထားခြင်းခံရသူများအား ပေးရမည်။ ဤသို့ခံစားခွင့်ရှိသူစာရင်းပေးမထားခဲ့ပါက ခံစားခွင့်ရရှိထိုက်သူများမှာ ဦးစားပေးအလိုက် - ကျန်ရစ်သူမုဆိုးမ(ဖို)၊ သားသမီးများ၊ မိဘများ ဖြစ်သည်။ ကျန်ရစ်သူအကျိုးခံစားခွင့်ကို အောက်ပါအတိုင်းပေးရန် ဖြစ်သည် -
- ထည့်ဝင်ကြေးငွေကို လပေါင်း ၆၀ နှင့်အောက် ပေးသွင်းပြီး ဖြစ်ပါက ပျမ်းမျှလုပ်ခ တစ်လစာ၏ ၃၀ ဆ၊
- ထည့်ဝင်ကြေးငွေကို လပေါင်း ၆၀ အထက်မှ လပေါင်း ၁၂၀ နှင့်အောက် ပေးသွင်းပြီး ဖြစ်ပါက ပျမ်းမျှလုပ်ခ တစ်လစာ၏ ၅၀ ဆ၊
- ထည့်ဝင်ကြေးငွေကို လပေါင်း ၁၂၀ အထက်မှ လပေါင်း ၂၄၀ နှင့် အောက်ပေးသွင်းပြီးဖြစ်ပါက ပျမ်းမျှလုပ်ခ တစ်လစာ၏ ၆၀ ဆ၊
- ထည့်ဝင်ကြေးငွေကို လပေါင်း ၂၄၀ အထက် ပေးသွင်းပြီး ဖြစ်ပါက ပျမ်းမျှလုပ်ခ တစ်လစာ၏ ၈၀ ဆ။
ကျန်ရစ်သူမုဆိုးမ(ဖို) အတွက်ပင်စင်အကျိုးခံစားခွင့်ရှိသည်။ မှီခိုသူအခြားမိသားစုဝင်များအတွက်မူ ၎င်းတို့သည်အိုမင်းသူ၊ မသန်စွမ်းသူများဖြစ်ပါကအကျိုးခံစားခွင့်ရှိသည်။ အခြားသောကျန်ရစ်သူများအတွက်ပင်စင်အကျိုးခံစားခွင့်ကိုမူ သေဆုံးသူနှင့်တော်စပ်မှု၊ ထိုသူ၏ဝင်ငွေ၊ အလုပ်လုပ်နိုင်ခြင်း၊ နှင့်ဆက်စပ်အနေအထားများအပေါ်မူတည်၍ လူမှုဖူလုံရေးအဖွဲ့က စဉ်းစားဆုံးဖြတ်နိုင်သည်။
နာရေးစရိတ်ကိုလည်း တစ်ကြိမ်ထုတ်ပေးငွေ (တလုံးတခဲတည်း) ပမာဏအဖြစ် ပေးအပ်ပါသည်။ (ပျမ်းမျှလုပ်ခ တစ်လစာ၏ အများဆုံး ငါးဆ အထိ သတ်မှတ်ချက်များနှင့် အညီ ခံစားခွင့်ရှိသည်)။ ၎င်းသည် လူမှုဖူးလုံရေးထည့်ဝင်ထားသော လများနှင့် နောက်ဆုံးလေးလအတွင်းပျမ်းမျှလုပ်ခ အပေါ် မူတည်သည်။
အလုပ်တွင်ထိခိုက်မှု အကျိုးခံစားခွင့်များကို လူမှုဖူလုံရေးအဖွဲ့မှ စီမံပါသည်။ အလုပ်ရှင်များသည် လူမှုဖူလုံကြေး ထည့်ဝင်ငွေကို လစဉ်လုပ်ခလစာ၏ ၁ ရာခိုင်နှုန်း ပေးသွင်းရမည်။
လူမှုဖူလုံရေးမှ အကျုံးမဝင်သော အလုပ်သမားများသည် အလုပ်သမား လျော်ကြေးအက်ဥပဒေ (၁၉၂၃) ပြဌာန်းချက်များအတိုင်း အကျိုးခံစားခွင့်ရှိသည်။ မတော်တဆမှုထိခိုက်မှုများတွင် အလုပ်သမားများအနေဖြင့် အခမဲ့ကျန်းမာရေးစစ်ဆေးမှုများပြုလုပ်နိုင်ရန် အလုပ်ရှင်မှ ပံ့ပိုးပေးရမည်။ အလုပ်ရှင်များသည် လုပ်ငန်းခွင်အတွင်း အလုပ်သမားတို့အနေဖြင့် ၎င်းတို့ဘာသာဖြစ်သော ထိခိုက်ဒဏ်ရာများနှင့် ရောဂါများအတွက် နစ်နာကြေးပေးရန် တာဝန်ရှိသည်။ တစ်ခုတည်းသောအခြေအနေမှာ အလုပ်သမားများအနေဖြင့် လုပ်ငန်းခွင်ထိခိုက်ဒဏ်ရာရမှုသည် အရက်သေစာ သို့မဟုတ် မူးယစ်ဆေးသုံးစွဲထားခြင်း သို့မဟုတ် အလုပ်ရှင်ချမှတ်ထားသော ဘေးကင်းလုံခြုံရေးစည်းကမ်းများကို မလိုက်နာခြင်း သို့မဟုတ် လုံခြုံရေးအကာအကွယ်များ သို့မဟုတ် အခြားလုံခြုံရေးကိရိယာများကို မိမိသဘောအလျောက် ဖယ်ရှားပစ်ခြင်း စသည့် အခြေအနေများအတွက်သာလျှင် အလုပ်သမား၏ ခံစားခွင့်များ ဆုံးရှုံးပါမည်။
အရင်းအမြစ်။
အပိုဒ် - ၃၀ ၊ ၅၅ - ၅၉ ၊ ၆၂ ၊ လူမှုဖူလုံရေးဥပဒေ (၂၀၁၂)
အပိုဒ် - ၃ နှင့် ၁၁၊ အလုပ်သမားလျော်ကြေးအက်ဥပဒေ ၁၉၂၃၁
