အကြောင်းကြားစာ နှင့် အလုပ်ထုတ် နစ်နာကြေး။

အကြောင်းကြားစာပေးရန်လိုအပ်ချက်။

အလုပ်ခန့်ထားမှုဆိုင်ရာ သဘောတူညီချက်စာချုပ်အရ သတ်မှတ်ကာလပြီးဆုံးသွားလျှင်သော်လည်းကောင်း၊ စက်ရုံ သို့မဟုတ် ကုမ္ပဏီ ပိတ်သိမ်းလျှင်သော်လည်းကောင်း (အလုပ်ရှင်၏ ဒေဝါလီခံမှု)၊ ကြိုတင်မှန်းဆခြင်းမပြုနိုင်သည့်ဖြစ်ရပ်ကြောင့်ပျက်စီးရလျှင်သော်လည်းကောင်း၊ တဘက်ဘက်မှ စာချုပ်ဖောက်ဖျက်လျှင်သော်လည်းကောင်း၊ အလုပ်သမားသေဆုံးလျှင်သော်လည်းကောင်း၊ အလုပ်ရှင်ကြောင့် မဟုတ်ပဲ ကြိုတင်မမျှော်လင့်ထားသော ပြဿနာများကြောင့် အလုပ်များလျော့ပါးသွားခြင်း(လုပ်သားလျော့ချခြင်းအပါအဝင်) နှင့် အလုပ်သမားသည် သတ်မှတ်ထားသော စည်းကမ်းချက်များကို အကြီးစားကျူးလွန်ဖောက်ဖျက်ခြင်းအတွက် ရာဇဝတ်ပြစ်ဒဏ်ကျလျှင်သော်လည်းကောင်း အလုပ်ခန့်ထားမှုဆိုင်ရာ သဘောတူညီချက်စာချုပ်ကို ရပ်စဲနိုင်သည်။

အလုပ်ရှင်၊ အလုပ်သမား တဘက်ဘက်က တစ်လကြိုတင်အသိပေးခြင်းဖြင့် အလုပ်ခန့်ထားမှုဆိုင်ရာ သဘောတူညီချက်စာချုပ်ကိုရပ်စဲနိုင်သည်။ သာမန်ပြစ်မှုများအတွက် ပထမအကြိမ်နှုတ်ဖြင့် သတိပေးခြင်း၊ ဒုတိယအကြိမ်စာဖြင့်သတိပေးခြင်း၊ တတိယအကြိမ် နှင့် နောက်ဆုံးအကြိမ်တွင် သတိပေးစာပေါ် ဝန်ခံကတိလက်မှတ်ရေးထိုးခြင်းဆောင်ရွက်စေနိုင်သည်။ ဤသတိပေးခြင်းသုံးကြိမ်ပြုလုပ်ပြီးနောက် အလုပ်သမားသည် သာမန်ပြစ်မှုကို ထပ်မံကျူးလွန်ခဲ့လျှင် အလုပ်ရှင်သည် သတိပေးအကြောင်းကြားခြင်းနှင့် နစ်နာကြေးပေးရန်မလိုဘဲ အလုပ်မှ ရပ်စဲနိုင်သည်။ ဝန်ထမ်းမှ သတ်မှတ်ထားသော စည်းကမ်းချက်များကို အကြီးစားကျူးလွန်ဖောက်ဖျက်ခြင်းကိစ္စတွင် အလုပ်ရှင်က အလုပ်ခန့်ထားမှုဆိုင်ရာ သဘောတူညီချက်စာချုပ်ကို ချက်ချင်းရပ်စဲနိုင်သည်။

(အရေးကြီးသောအကြောင်းပြချက်များအတွက်) အလုပ်သမားအား တည်ဆဲဥပဒေ၊ နည်းဥပဒေ၊ စည်းမျဉ်းစည်းကမ်းများနှင့်အညီ အလုပ်ရှင်တစ်ဦးက တစ်လကြိုတင်အကြောင်းကြား၍ သတ်မှတ်ထားသော နစ်နာကြေးပေးပြီး အလုပ်မှရပ်စဲခြင်း သို့မဟုတ် ထုတ်ပယ်ခြင်း ပြုလုပ်နိုင်သည်။ အစမ်းခန့်ကာလအတွင်း အလုပ်သမားတစ်ဦးက အလုပ်မှနှုတ်ထွက်လိုပါက အလုပ်ရှင်သို့ (၇) ရက်ကြိုတင်အကြောင်းကြားရန် လိုအပ်ပါသည်။

အလုပ်သမားအဖွဲ့အစည်း ဥပဒေအရ အလုပ်ရှင်က အလုပ်သမားတစ်ဦးဦးအား အလုပ်မှ ထုတ်ပယ်ရာတွင် ထိုသို့အလုပ်မှ ထုတ်ပယ်သောအကြောင်းရင်းများသည် အလုပ်သမားအဖွဲ့အစည်းဝင်ဖြစ်မှု သို့မဟုတ် အလုပ်သမားအဖွဲ့အစည်းတွင် လုပ်ဆောင်မှုနှင့် သက်ဆိုင်လျှင်ဖြစ်စေ သို့မဟုတ် တရားဝင်သပိတ်မှောက်ခြင်းများတွင် ပါဝင်ခြင်းအတွက် အလုပ်ရှင်သည် ၎င်းအလုပ်သမားကို အလုပ်ထုတ်ခွင့်မရှိပါ။

အရင်းအမြစ်။ အလုပ်ခန့်ထားမှုဆိုင်ရာသဘောတူညီချက်စာချုပ်၊ ၂၀၁၇ အပိုဒ် ၅၊ ၂၀၁၃ခုနှစ် အလုပ်အကိုင်နှင့် ကျွမ်းကျင်မှုဖွံ့ဖြိုးတိုးတက်ရေးဥပဒေ အပိုဒ် ၄၄၊ ၂၀၁၁ခုနှစ် အလုပ်သမားအဖွဲ့အစည်းဥပဒေ

အလုပ်ထုတ် နစ်နာကြေး။

အလုပ်သမား၊အလုပ်အကိုင်နှင့်လူမှုဖူလုံရေးဝန်ကြီးဌာန၊ ပြည်ထောင်စုဝန်ကြီးသည် အလုပ်သမား ရေးရာအငြင်းပွားမှု ဖြေရှင်းရေးဥပဒေ ပုဒ်မ ၅၉ ပုဒ်မခွဲ (ခ) နှင့် အလုပ်အကိုင်နှင့် ကျွမ်းကျင်မှု ဖွံ့ဖြိုးတိုးတက်ရေးဥပဒေ ပုဒ်မ ၄၁ ပုဒ်မခွဲ (ခ) တို့အရ အပ်နှင်းထားသော လုပ်ပိုင်ခွင့် ပေးရမည့် နစ်နာကြေးနှုန်းထားများကို သတ်မှတ်လိုက်သည်။

ဖော်ပြပါ ကိစ္စများဖြစ်သော "အလုပ်ရှင်နှင့်အလုပ်သမား နှစ်ဦးနှစ်ဖက်သဘောတူညီချက်ဖြင့် မူလချုပ်ဆိုထားသော အလုပ်ခန့်ထားမှုဆိုင်ရာသဘောတူညီချက်စာချုပ်အား ဖျက်သိမ်းခြင်း၊ ဝန်ထမ်းမှ အလုပ်နှုတ်ထွက်ခြင်း၊ ဝန်ထမ်းမှ သတ်မှတ်ထားသော စည်းကမ်းချက်များကို အကြီးစားကျူးလွန်ဖောက်ဖျက်ခြင်း၊ နှင့် သတိပေးအကြောင်းကြားပြီးမှ အလုပ်မှရပ်စဲခံရသော အလုပ်သမားနှင့် ပတ်သက်၍ အလုပ်ရှင်က ပေးရမည့် နစ်နာကြေးနှုန်းထား ပေးရန်မလိုပါ။။ အကယ်၍ အလုပ်ခန့်ထားမှုဆိုင်ရာ စာချုပ်အား အခြားအကြောင်းများကြောင့် အလုပ်မှ ရပ်စဲခံရသော အလုပ်သမားနှင့် ပတ်သက်၍ (လုပ်သားလျော့ချခြင်းအပါအဝင်) အလုပ်ရှင်ကပေးရမည့် နစ်နာကြေးနှုန်းထားများမှာ အောက်ပါအတိုင်းဖြစ်သည်။

1. လုပ်သက် ခြောက်လထက်လျှော့သောအလုပ်သက်တမ်းအတွက်ရှင်းပေးရန်မလို
2. လုပ်သက် ခြောက်လပြည့်ပြီး တစ်နှစ်မပြည့်ပါက နစ်နာကြေး လဝက်စာ
3. လုပ်သက် တစ်နှစ်ပြည့်ပြီး နှစ်နှစ် မပြည့်ပါက နစ်နာကြေး တစ်လစာ
4. လုပ်သက် နှစ်နှစ်ပြည့်ပြီး သုံးနှစ်မပြည့်ပါက နစ်နာကြေး တစ်လခွဲ လစာ
5. လုပ်သက် သုံးနှစ်ပြည့်ပြီး လေးနှစ် မပြည့်ပါက နစ်နာကြေး သုံးလစာ
6. လုပ်သက် လေးနှစ်ပြည့်ပြီး ခြောက်နှစ် မပြည့်ပါက နစ်နာကြေး လေးလစာ
7. လုပ်သက် ခြောက်နှစ်ပြည့်ပြီး ရှစ်နှစ် မပြည့်ပါက နစ်နာကြေး ငါးလစာ
8. လုပ်သက် ရှစ်နှစ်ပြည့်ပြီး တစ်ဆယ်နှစ် မပြည့်ပါက နစ်နာကြေး ခြောက်လစာ
9. လုပ်သက် တစ်ဆယ်နှစ်ပြည့်ပြီး ၂၀ နှစ် မပြည့်ပါက နစ်နာကြေး ရှစ်လစာ

အရင်းအမြစ်။ အမိန့်ကြော်ငြာစာအမှတ် (၈၄ /၂၀၁၅)

ဆက်စပ်သည့်အကြောင်းအရာများ။

စာချုပ်များနှင့် ထုပ်ပယ်မှုများ။