ကိုယ်ဝန်ဆောင်မိခင် နှင့် အလုပ်တာဝန်

မွေးဖွားခွင့်။

လူမှုဖူလုံရေးအာမခံထားသူ အမျိုးသမီးအလုပ်သမားသည် စုစုပေါင်း အနည်းဆုံး ရက်သတ္တပတ် ၁၄ ပတ်အထိ မီးဖွားခွင့်ကို ခံစားခွင့်ရှိသည်။ လူမှုဖူလုံရေးအာမခံရှိသူဖြစ်စေ၊ မရှိသူဖြစ်စေ ကိုယ်ဝန်ဆောင်အလုပ်သမားတစ်ဦးသည် မီးမဖွားမီ ရက်သတ္တပတ် ခြောက်ပတ်နှင့် မီးဖွားပြီးနောက် အနည်းဆုံး ရက်သတ္တပတ် ရှစ်ပတ် မီးဖွားခွင့်ကို ခံစားခွင့်ရှိသည်။ အမြွှာကလေးမွေးပါက မီးဖွားခွင့်ခံစားပြီးနော်က ကလေးစောင့်ရှောက်ရန် ရက်သတ္တပတ် လေးပတ်ကို ဆက်လက်ခံစားခွင့်ရှိသည်။ ပြစ်ဒဏ်ထိုက်သင့်သည် ကိုယ်ဝန်ပျက်စေခြင်း မဟုတ်ဘဲ ကိုယ်ဝန်ပျက်သည့် ကိစ္စတွင် အများဆုံး ရက်သတ္တပတ်ခြောက်ပတ်အထိ မီးဖွားခွင့်အဖြစ် ခံစားခွင့်ရှိသည်။ ကိုယ်ဝန်ဆောင်စဉ် ခွင့်ပြုထားသည့် ဆေးရုံ၊ ဆေးခန်း၌ စမ်းသပ်စစ်ဆေး ပြသနိုင်ရန်အတွက် တစ်ကြိမ်လျှင် တစ်ရက်နှုန်းဖြင့် အများဆုံး ခုနှစ်ကြိမ်အထိ လုပ်အပြည့် ခံစားခွင့် ရှိသည်။ တစ်နှစ်အောက် ကလေးကို တည်ဆဲဥပဒေနှင့်အညီ မှတ်ပုံတင်၍ မွေးစားပါက ထိုကလေး တစ်နှစ်ပြည့်သည်အထိ ပြုစုစောင့်ရှောက်ရေးအတွက် ရက်သတ္တပတ် ရှစ်ပတ်ထက်မကျော်သော ခွင့်ကို မွေးစားကလေးတစ်ဦးအတွက်သာ ခံစားခွင့်ရှိသည်။

အရင်းအမြစ်။
အပိုဒ် - ၂၅ (ဂ နှင့် ဃ)၊ လူမှုဖူလုံရေးဥပဒေ (၂၀၁၂)။

ဝင်ငွေ။

အာမခံထားသူ အမျိုးသမီးသည် မီးဖွားမှုနှင့်ဆိုင်သည့် ငွေကြေး အကျိုးခံစားခွင့်ကို ခွင့်စတင်ခံစားသည့်နေ့မတိုင်မီ သက်ဆိုင်ရာ လုပ်ငန်းဌာနတွင် အနည်းဆုံး တစ်နှစ်လုပ်ကိုင်ခဲ့သူ ဖြစ်ရမည့်အပြင် အဆိုပါ တစ်နှစ်အတွင်း အနည်းဆုံးခြောက်လအတွက် ထည့်ဝင် ကြေးပေးသွင်းပြီးသူဖြစ်မှသာ ခံစားခွင့် ရှိစေရမည်။

မီးဖွားခွင့်ကာလ (၁၄ ပတ်) အတွက် မီးဖွားမှုနှင့်ဆိုင်သည့် အကျိုး ခံစားခွင့်အဖြစ် တစ်နှစ်အတွင်း ပျမ်းမျှလုပ်ခ၏ ၇၀ ရာခိုင်နှုန်းဖြစ်သည်။ ကိုယ်ဝန်ပျက်မှုကြောင့် ခံစားခွင့်ရှိသော မီးဖွားခွင့်ကာလအတွင်း ပျမ်းမျှလုပ်ခ၏ ၇၀ ရာခိုင်နှုန်း ဖြစ်သည်။ မီးဖွားမှုအကျိုးခံစားခွင့်တွင် ကလေးတစ်ဦးမွေးဖွားပါက မီးဖွားစရိတ်လည်း ပါဝင်သည်။ ကလေးတစ်ဦးမွေးဖွားပါက မီးဖွားစရိတ်အဖြစ် ပျမ်းမျှလုပ်ခ တစ်လစာ၏ ၅၀ ရာခိုင်နှုန်း၊ အမြွှာ ကလေးနှစ်ဦးမွေးပါက မီးဖွားစရိတ်အဖြစ် ပျမ်းမျှလုပ်ခ တစ်လစာ၏ ၇၅ ရာခိုင်နှုန်း၊ အမြွှာကလေး သုံးဦးနှင့်အထက်မွေးပါက မီးဖွားစရိတ်အဖြစ် ပျမ်းမျှလုပ်ခ တစ်လစာ၏ ၁၀၀ ရာခိုင်နှုန်း ဖြစ်သည်။ အထက်ဖော်ပြပါ မီးဖွားခွင့်ကာလအတွက် မီးဖွားမှုနှင့်ဆိုင်သည့် အကျိုးခံစားခွင့်နှင့် မီးပွားစရိတ်များကို အာမခံထားသူ အမျိုးသမီးအလုပ်သမားသည် ဆေးသက်သေခံလက်မှတ်အရ သတ်မှတ်ချက်များနှင့်အညီ ခံစားခွင့်ရှိသည်။

အရင်းအမြစ်။ အပိုဒ် - ၂၆ နှင့် ၂၇၊ လူမှုဖူလုံရေးဥပဒေ (၂၀၁၂)

အခမဲ့ကျန်းမာရေးစောင့်ရှောက်မှု။

အာမခံထားသူ အမျိုးသမီးသည် ကိုယ်ဝန်ဆောင်နေစဉ်နှင့် မီးဖွားသည့်အခါ ခွင့်ပြုထားသည့် ဆေးရုံ၊ ဆေးခန်း၌ အခမဲ့ ဆေးကုသမှုခံယူခွင့် ရှိသည်။ ထိုခံစားခွင့်တွင် အတွင်းလူနာ၊ ပြင်ပလူနာ စောင့်ရှောက်မှု၊ ဆေးပစ္စည်း၊ ဓါတ်ခွဲခန်းဝန်ဆောင်မှု၊ နှင့် မြို့ပြင်ဆင်ခြေဖုံးဒေသများသို့ လွှဲပြောင်းခြင်းများရှိပါက သယ်ယူပို့ဆောင်မှုတို့ပါဝင်သည်။ လူမှုဖူလုံရေးအာမခံထားသူ အမျိုးသမီးအလုပ်သမားသည် မီးဖွားပြီး တစ်နှစ်အထိ မိမိကလေးကို ဆေးကုသမှု ခံယူခွင့်ရှိသည်။

အရင်းအမြစ်။ အပိုဒ်၂၅ (က)၊ လူမှုဖူလုံရေးဥပဒေ (၂၀၁၂)။