စာချုပ်များနှင့် ထုပ်ပယ်မှုများ။

အလုပ်အကိုင်ဆိုင်ရာ ရေးသားဖေါ်ပြချက်များ။

အလုပ်ခန့်ထားမှုဆိုင်ရာ သဘောတူညီချက်စာချုပ်သည် တိကျသောသက်တမ်းဖော်ပြပါရှိသည့် အလုပ်ခန့်ထားမှုဆိုင်ရာ သဘောတူညီချက်စာချုပ် သို့မဟုတ် ရက်အကန့်အသတ်ဖော်ပြပါရှိခြင်းမရှိသည့် အလုပ်ခန့်ထားမှု သဘောတူစာချုပ် ဖြစ်နိုင်ပါသည်။ ဥပဒေအရ ရေးသားထားသော အလုပ်ခန့်ထားမှုဆိုင်ရာ သဘောတူညီချက်စာချုပ် ချုပ်ဆိုရမည်။ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနသည် ၎င်း၏ အလုပ်ခန့်ထားမှုဆိုင်ရာ သဘောတူညီချက်စာချုပ် ချုပ်ဆိုရန် စာချုပ်ပုံစံကို 2015 ခုနှစ်တွင် ထုတ်ပြန်ခဲ့ပြီး အလုပ်ရှင်များအနေဖြင့် ဤစာချုပ်ပုံစံကို အသုံးပြုရန် လိုအပ်ပါသည်။ အလုပ်သမားညွှန်ကြားရေးဦးစီးဌာန၏ ခွင့်ပြုချက်မရှိဘဲ အဆိုပါပုံစံ၏အကြောင်းအရာများကို ပြောင်းလဲ၍ မရပါ။

အလုပ်ရှင်သည် အလုပ်သမားအား အလုပ်တစ်ခုခုကို လုပ်ကိုင်ရန် ခန့်အပ်ပြီးပါက အလုပ်ခန့်ထားမှုဆိုင်ရာ သဘောတူညီချက်စာချုပ်ကို စာဖြင့်ရေးသားပြင်ဆင်ရန် မဖြစ်မနေ လိုအပ်ပါသည်။ ထိုစာချုပ်ကိုအင်္ဂလိပ် - မြန်မာနှစ်ဘာသာဖြင့်ရေးသားထားရမည်။ အလုပ်ခန့်ထားမှုဆိုင်ရာ သဘောတူညီချက်စာချုပ်သည် အလုပ်အကိုင်နှင့် ကျွမ်းကျင်မှုဖွံ့ဖြိုးတိုးတက်ရေးဥပဒေ 2013 ပါ ပြဋ္ဌာန်းချက်များနှင့်အညီ ရေးဆွဲရမည်။ အလုပ်ခန့်ထားခြင်းမပြုမီ အကြိုသင်တန်းကာလနှင့် အစမ်းခန့်ကာလ သတ်မှတ်ပါက အဆိုပါသင်တန်းသားများမှ လွဲ၍ အလုပ်ခန့်အပ်ပြီးပါက ရက်ပေါင်း ၃၀ အတွင်း အလုပ်ခန့်ထားမှုဆိုင်ရာ သဘောတူညီချက်စာချုပ်ချုပ်ဆိုရမည်။

အလုပ်ခန့်ထားမှုဆိုင်ရာသဘောတူညီချက်စာချုပ်တွင် ဝင်ငွေအဖြစ် သတ်မှတ်နိုင်သော အခြားငွေ၊ အလုပ်ရပ်စဲခြင်း၊ ကြာချိန်နှင့် လူမှုဖူလုံရေးအကျိုးခံစားခွင့်များဆိုင်ရာ အပိုဒ်များအတိအလင်း ဖော်ပြထားရမည်။ အလုပ်ခန့်ထားမှုဆိုင်ရာသဘောတူညီချက်စာချုပ်တွင် လုပ်ခ၊လစာ၊ အလုပ်အကိုင်အမျိုးအစား၊ အလုပ်အကိုင်တည်နေရာ၊ အလုပ်ချိန်၊ အားလပ်ရက်များ၊ အလုပ်ချိန်အတွင်း အစားအသောက်အစီအစဉ်၊ ဆေးဝါးကုသခြင်း၊ အလုပ်ရပ်စဲမှုဆိုင်ရာ ပြဌာန်းများ နှင့် နေရာထိုင်ခင်းနှင့် လုပ်ငန်းခွင်သို့ ကြို/ပို့ယာဉ်စီစဉ်ပေးခြင်းနှင့် ခရီးသွားလာခြင်း အစီအစဉ် (ရှိပါက) တို့ကိုထည့်သွင်းဖော်ပြရမည်။ အလုပ်ရှင်နှင့် အလုပ်သမားနှစ်ဖက် လက်မှတ်ရေးထိုးချုပ်ဆိုပြီးပါက သက်ဆိုင်ရာမြို့နယ် သို့မဟုတ် ခရိုင်ရှိ အလုပ်အကိုင်နှင့် အလုပ်သမားရှာဖွေရေးရုံးသို့ အတည်ပြုချက်ရယူရမည်။ ၂၀၁၈ ခုနှစ် ဇူလိုင်လမှစတင်၍ လုပ်ငန်းများသည် အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနမှ ထုတ်ပြန်သည့် အလုပ်ခန့်ထားမှုဆိုင်ရာသဘောတူညီချက်စာချုပ်ပုံစံကို အသုံးပြုရန် လိုအပ်ပါသည်။ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၏ သဘောတူညီချက်ဖြင့်သာ အလုပ်ခန့်ထားမှုဆိုင်ရာသဘောတူညီချက်စာချုပ်ပုံစံကို ပြုပြင်ပြောင်းလဲနိုင်သည်။

အလုပ်ရှင်မှ ၎င်းအလုပ်သမားကို အလုပ်ခန့်ထားမှုဆိုင်ရာ သဘောတူညီချက်စာချုပ်ချုပ်ရန် ပျက်ကွက်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို အလုပ်အကိုင်နှင့် ကျွမ်းကျင်မှုဖွံ့ဖြိုးတိုးတက်ရေးဥပဒေအရ ခြောက်လထက်မပိုသောထောင်ဒဏ်ဖြစ်စေ၊ ငွေဒဏ်ဖြစ်စေ၊ ပြစ်ဒဏ်နှစ်ရပ်လုံး ဖြစ်စေ ချမှတ်နိုင်သည်။ ထို့အပြင် အလုပ်သမားညွှန်ကြားရေးဦးစီးဌာနတွင် မှတ်ပုံတင်ထားခြင်းမရှိသော အလုပ်ခန့်ထားမှုဆိုင်ရာ သဘောတူညီချက်စာချုပ်များကို အတည်မဖြစ်ဟု ယူဆရမည်။

တည်ဆဲအလုပ်သမားဥပဒေများနှင့်အညီပြင်ဆင်ခြင်းနှင့်ဖြည့်စွက်ခြင်းပြုလုပ်လိုပါက အလုပ်ရှင်နှင့်အလုပ်သမားနှစ်ဦးနှစ်ဖက်ညှိနှိုင်းဆွေးနွေးပြင်ဆင်ဖြည့်စွက်ပြီးနောက် အဆိုပါသဘောတူစာချုပ်အသစ်ကိုလည်း သက်ဆိုင်ရာမြို့နယ်အလုပ်အကိုင်နှင့်အလုပ်သမားရှာဖွေရေးရုံးများသို့ ပေးပို့ရမည်။

အရင်းအမြစ်။
အပိုဒ် - ၅ နှင့် ၃၈၊ အလုပ်အကိုင်နှင့်ကျွမ်းကျင်မှုဖွံ့ဖြိုးတိုးတက်ရေးဥပဒေ (၂၀၁၃)
သြဂုတ်လ ၃၁ ရက်နေ့တွင် အလုပ်ခန့်ထားမှုဆိုင်ရာ သဘောတူညီချက်စာချုပ် ရေးဆွဲချုပ်ဆိုရန် ထုတ်ပြန်ခဲ့သည့် ကြေညာချက်အမှတ် (၁ /၂၀၁၅) ကို ပယ်ဖျက်လိုက်ပြီး အမိန့်ကြော်ငြာစာအမှတ် (၁၄၀/၂၀၁၇) အလုပ်ခန့်ထားမှုဆိုင်ရာ သဘောတူညီချက်စာချုပ် ချုပ်ဆိုရန်ကြေညာခြင်း ဖြင့် အစားထိုးခဲ့သည်။

သက်တမ်းဖော်ပြပါရှိသည့် အလုပ်ခန့်ထားမှုသဘောတူ စာချုပ်

တိကျသောသက်တမ်းဖော်ပြပါရှိသည့် အလုပ်ခန့်ထားမှုဆိုင်ရာ သဘောတူညီချက်စာချုပ်သည် အမြဲလုပ်ကိုင်ရသော အလုပ်သဘောသဘာဝအလုပ်များအတွက် ခွင့်ပြုထားသည်။ တိကျသောသက်တမ်းဖော်ပြပါရှိသည့် အလုပ်ခန့်ထားမှုဆိုင်ရာ သဘောတူညီချက်စာချုပ်အတွက် ဥပဒေတွင်မည်သည့်ကန့်သတ်ချက်မှ မသတ်မှတ်ထားပေ။ ထို့အပြင် သက်တမ်းတိုးရန် သတ်မှတ်ချက်လည်း မရှိပါ။ တိကျသောသက်တမ်းဖော်ပြပါရှိသည့် အလုပ်ခန့်ထားမှုဆိုင်ရာ သဘောတူညီချက်စာချုပ်သည် အချိန်ကာလအကန့်အသတ် မရှိခြင်းဖြစ်နိုင်သည်။ တရားဝင်စာချုပ်ပုံစံတွင် စာချုပ်သက်တမ်းကာလသတ်မှတ်ခြင်းကို အလုပ်ရှင်အား ခွင့်ပြုထားသည်။ တိကျသောသက်တမ်းဖော်ပြပါရှိသည့် အလုပ်ခန့်ထားမှုဆိုင်ရာ သဘောတူညီချက်စာချုပ်ကို စာချုပ်သက်တမ်းမကုန်ဆုံးမီ တစ်လအလိုတွင် အလုပ်ရှင်၊ အလုပ်သမား ညှိနှိုင်း၍ သတ်မှတ်ကာလကို သက်တမ်းတိုးခြင်း သို့မဟုတ် ပြင်ဆင်ခြင်း သို့မဟုတ် ပြောင်းလဲခြင်းများ ပြုလုပ်နိုင်သည်။

အစမ်းခန့်ကာလ။

အစမ်းခန့်ကာလကို ဥပဒေတွင် သတ်မှတ်ထားခြင်းမရှိပါ။ သို့ရာတွင် ယေဘုယျအားဖြင့် အလုပ်သမားတစ်ဦး၏ အစမ်းခန့်ကာလသည် (၃)လထက် မပိုပါ။ တရားဝင်ပြဌာန်းထားသောအလုပ်ခန့်ထားမှုဆိုင်ရာသဘောတူညီချက်စာချုပ်ပုံစံတွင် အစမ်းခန့်ကာလကို (၃)လ အထိ အစမ်းခန့်ကာလအဖြစ် ဖော်ပြထားသည်။ အစမ်းခန့်ကာလပြီးနောက် အလုပ်သမားသည် ၎င်း၏ရာထူးတွင် ကျေနပ်လောက်သော စွမ်းဆောင်ရည်ပြသခဲ့လျှင် အလုပ်ရှင်သည် အလုပ်သမားအား ဆက်လက်အလုပ်ခန့်နိုင်သည်။ သို့ရာတွင် အစမ်းခန့်ကာလပြီးဆုံးပြီးနောက် အမြဲတမ်းအလုပ်ခန့်ထားရန် အလုပ်ရှင်ဘက်မှ လုပ်ဆောင်ရန် မလိုအပ်ပါ။ အလုပ်ရှင်တစ်ဦးမှ အလုပ်သမားအား အစမ်းခန့်ကာလ မလိုအပ်ဟု ယူဆပါက အတည်ပြု (အမြဲတမ်း) ဝန်ထမ်းအဖြစ် တိုက်ရိုက်ခန့်အပ်နိုင်သည်။ အလုပ်သမားအသစ်များအတွက် လေ့ကျင့်ရေး၊ အလုပ်သင်ကာလသည် အများဆုံး (၃)လ အထိ ပြဌာန်းချက်လည်း ရှိပါသည်။ အလုပ်ရှင်များသည် သီးခြားလေ့ကျင့်ရေးဆိုင်ရာသဘောတူညီချက်တစ်ရပ်ကို ထည့်သွင်းနိုင်သော်လည်း အစမ်းခန့်ကာလအတွက်မူ သဘောတူညီချက် သီးသန့်မလိုအပ်ပါ။

အရင်းအမြစ် အလုပ်ခန့်ထားမှုဆိုင်ရာ သဘောတူညီချက်စာချုပ်ပုံစံ ၂၀၁၇