Tariximiz

WageIndicator-in tarixi

Bizim möhtəşəm təşkilatımız iki qadın – jurnalist Polin Osse və professor Kea Tiydens tərəfindən təsis olunub. Onlar bu "səyahətə" 1999-cu ildə bir təcili missiya ilə başlayıblar: insanların təcrübəsi, təhsili və potensialına əsaslanan maaş məlumatlarını hər kəs üçün əlçatan etmək. O vaxt maaşlar və iş yerləri barədə məlumatların əksəriyyəti əmək bazarının zirvəsindəki yüksək təhsilli ağdərili kişilər üçün idi. Qadınlar, öz işini quranlar, uşaqlara baxan və ya ev təmizləyən insanlar, əmək bazarına yeni daxil olan gənclər və aşağı və orta ixtisaslı işçilər üçün belə məlumatlar mövcud deyildi. Beləliklə, WageIndicator təşəbbüslərindən biri və birincisi – Loonwijzer yarandı. Loonwijzer platformasındakı sadə Maaşın Yoxlanması aləti böyük marağa səbəb oldu və tezliklə bu alət daha çox ölkədə istifadəyə verildi. 2004-cü ildə biz Avropanın müxtəlif ölkələrinə genişlənərək, VotreSalaire, Mojplat, Mojazarplata, MeuSalario və TuSalario kimi vebsaytlar yaratdıq. 2006-cı ildə isə Paraqvay və Hindistanda Minimum Əməkhaqqı məlumatlarını toplamağa başladıq, çünki əmək bazarının aşağı seqmenti üçün maaş məlumatlarını toplayanda Minimum Əməkhaqqının əhəmiyyətini kifayət qədər vurğulamaq mümkün olmur.

Dünyanın ən böyük minimum əməkhaqqı məlumat bazasının yaradılması

Hindistanın dünyada ən mürəkkəb Minimum Əməkhaqqı sistemlərindən birinə sahib olduğunu nəzərə alıb, oradan başlamağın məntiqli olduğunu düşündük. İndi isə 216 ölkə və ərazini əhatə edən, dünyanın ən böyük və ən yeni Minimum Əməkhaqqı bazasına sahibik. 2008-ci ildə həyata keçirdiyimiz "Decisions for Life" (Həyat Qərarları) layihəsi bizə işçilərin (xüsusilə qadınların) həyatının müxtəlif mərhələlərində lazım olan məlumatları yenidən gözdən keçirməyə vadar etdi. İnsanların əmək bazarındakı inkişaf trayektoriyasını anlamaq üçün minimum əməkhaqqı, maaşlar və qanunvericilik barədə məlumatlara ehtiyac vardı. Mozambikdəki həmkarlar ittifaqları işçiləri üçün hazırlanmış testlə biz Layiqli Əmək Meyarlarının Təftişi (Decent Work Check) layihəsinə başladıq. Layiqli Əmək Meyarlarının Təftişi əmək hüquqlarının ümumi icmalıdır və işçilərin özlərinin yoxlama aparmasına imkan verir. Qlobal Əmək Qanunvericiliyi bazamız və Layiqli Əmək Meyarlarının Təftişi üzrə fəaliyyətimiz o ilk testdən sonra genişləndi. 2012-ci ildə biz Afrikanın 12 ölkəsindəki həmkarlar ittifaqları və işəgötürənlərlə sıx əməkdaşlıq edərək, kollektiv sövdələşmə müqavilələrini (KSM) topladıq, təhlil və şərh etdik. Bu, çox vacib idi, çünki bir çox ölkədə KSM rəqəmsallaşdırılmamışdı, işçilər və peşə ittifaqları üçün əlçatan deyildi. Nəticədə minlərlə mövzunu və dünyanın müxtəlif sektorlarını əhatə edən qlobal KSM bazası və annotasiya sistemi yarandı.

Minimum əməkhaqqından yaşayış minimumuna

İqtisadçıdan 100 ölkə üçün Yaşayış Minimumunu hesablamasını istəyəndə nə baş verər? O, "Niyə yox?" deyər. Beləliklə, biz də ilk dəfə 2014-cü ildə 100 ölkə üçün Yaşayış Minimumu hesabladıq. İllər keçdikcə metodologiyamız və əməliyyatlarımız genişləndi, inkişaf etdi, onlayn formatdan əsasən oflayn üsula, piyada gəzərək məlumat toplamağa keçdik. İndi data toplamaqla məşğul olan 400-dən çox həmkarımızla ərsəyə gətirdiyimiz qlobal Yaşayış Minimumu bazamız dünyanın əksər ölkə və regionlarını əhatə edir. Yaşayış Minimumu göstəricilərimiz ictimaiyyətə açıqdır, həmçinin böyük və kiçik şirkətlərlə əməkdaşlıq edərək, bu göstəricilərin onların öz əməliyyatlarında və təchizat zəncirlərində tətbiqinə yardım göstəririk. Bundan əlavə, bütün ölkə və regionlar üçün Gəlirlərlə bağlı məlumatları təqdim edirik və öz işini quranlar üçün Yaşayış Minimumu-Tariflər konsepsiyasını inkişaf etdirmişik. İllər ərzində WageIndicator fəaliyyətlərinə bir çox ad əlavə edib: Gajimu, Paycheck, Twojezarobki, Rawateb, MyWage, Prake, MiSalario, Lontjek, Berbarometer, Iltuosalario, Luong bu adlardan yalnız bəziləridir. Üstəlik, məlumat bazalarımıza və kommunikasiyalarımıza Gig (qısamüddətli əmək fəaliyyəti) iqtisadiyyatı və süni intellektin yüksəlişi kimi mövzuları, kodları və skriptləri də əlavə etmişik.

Davam edən missiyamız

Məqsədimiz hər zaman eyni olub: əvvəllər məlumat və strukturun çatışmadığı sahələrdə onları təqdim edirik, məlumatları davamlı yeniləyirik və inklüzivliklə əlçatanlığı təmin edirik. Akademiklər, jurnalistlər və sosial tərəfdaşlarla əməkdaşlıq edərək – ilk gündən etdiyimiz kimi – əmək bazarının şəffaflığı üçün çalışmağa davam edirik.